Припадници на израелската војска убија палестински тинејџер и ранија околу 40 лица на протестот на кој денеска присуствуваа илјадници луѓе на границата со Појасот Газа.
Министерството за здравство во Газа соопшти дека 15-годишното палестинско момче починало откако било погодено со огнено оружје од израелските војници, а портпаролката на израелската војска рече дека војниците користеле „средства за растурање на немирите“ и дека отвориле оган во согласност со стандардните оперативни процедури за такви случаи.
Израелската армија соопшти дека интервенирала поради немирите и обидите на некои луѓе да фрлат бомби и други експлозивни направи на територијата на Израел од Појасот Газа, кој е под контрола на Хамас.
Учесниците на протестот повикуваат Палестинците да се вратат во земјата од која нивните предци избегале или биле принудени да избегаат во 1948 година, кога е прогласена државата Израел.
