Капиталниот ремонт на Блок 2 на РЕК Битола заврши соопштија од компанијата. Оттаму додаваат дека постројката е синхронизирана со електроенергетскиот систем на земјата и испорачува електрична енергија согласно потребите на потрошувачите.
– Ремонтните активности на Блок 2 на РЕК Битола започнаа на 7 септември и за време на зафатот беше направен капитален ремонт на турбината, првпат по осум години. Паралелно се одвиваше и првата фаза од реконструкцијата на разладната кула на постројката. Со тоа, зголемена е доверливоста и ефикасноста на Блокот – наведуваат од компанијата.
По вклучувањето на Блок 2, најавуваат, дека од работа ќе биде исклучен Блок 1 на РЕК Битола и производството од комбинатот ќе продолжи со Блок 2 и Блок 3, согласно планот за производство на АД ЕСМ и потребите на системот.
Оттаму оценуваат дека во моментов, електроенергетскиот систем на земјата има доволно количество струја што ја обезбедуваат капацитетите на компанијата. Блок 1 на РЕК Битола ќе остане во состојба на „ладна резерва”, подготвен да биде вклучен во производствен процес во секој момент кога ќе има потреба електроенергетскиот систем на државата.
Во периодот од 1 јануари 2019 година до 2 декември 2019 година, РЕК Битола од планираните 3.025 гигават часови произведе 3.252 гигават часови електрична енергиија, односно 108 проценти од планираното.
