Македонскиот актер Благој Веселинов е официјален учесник во програмата „Европски филмски ѕвезди“ на претстојното 69-то издание на престижниот Берлински филмски фестивал 2019, соопштија од Агенцијата за филм на Република Македонија.
Триесет и четиригодишниот Веселинов по тој повод ќе ја добие наградата „Шутинг старс“, што традиционално се доделува за време на Берлинскиот филмски фестивал, чие следно издание ќе се одржи од 7 до 17 февруари.
Со тоа, Веселинов официјално е одбран како еден од десетте најдобри млади европски актери, кои покрај тоа што ќе имаат чест да бидат јавно претставени на фестивалот како ѕвезди во подем, ќе бидат и дел од посебна платформа, која нуди единствена можност за остварување директни средби со кастинг директори, продуценти и воопшто со филмски професионалци од целиот свет. Ова е голем успех на Благој Веселинов, не само како признание на неговата досегашна работа, туку како отворање широка врата за негова меѓународна кариера, а воедно и за Македонија кон светската кинематографија.
Благој Веселинов е по потекло од Кочани, дипломирал на Факултетот за драмски уметности во Скопје и во прилог на неговата успешна кариера се повеќе од 50 театарски претстави и многубројни филмски улоги во краткометражни и долгометражни филмови, меѓу кои: „Исцелител“, „Како да ме нема“, „Панкот не е мртов“, „Балканот не е мртов“, „Година на мајмунот“, „Ослободување на Скопје“ и други.
Неговото последно актерско остварување, улогата на Веле во филмот „Исцелител“ на Ѓорче Ставревски, е круцијално за жирито на Берлинскиот филмски фестивал да го одбере за учесник во програмата и да ја истакне својата импресионираност од неговата изведба на ликот каде што „мошне умешно покажува длабока и изненадувачка чувствителност, а истовремено иако многу суптилно, умно и контролирачки прави пресврт покажувајќи ја својата искрена врска со неговиот лик“.
Во рамките на оваа програма Македонија досега учествувала со две актерки – Лабина Митевска (1998) и Наташа Петровиќ (2011).
Во ова издание на Берлинскиот филмски фестивал член на жирито е и македонската режисерка Теона Стругар-Митевска, а покрај неа, членови на жирито што ги избра талентите годинава се: американската кастинг-директорка Ејви Кауфман, филмската критичарка Тара Карајица од Србија, продуцентот Макдара Келехер од Ирска и исландската актерка Ингвар Сигурдсон, „Европска филмска ѕвезда“ од 1999 година,.
Благој Веселинов како „Европска филмска ѕвезда“ е, всушност, уште едно големо признание во низата за филмот „Исцелител“, кој е и македонскиот кандидат за наградата „Оскар на полуларноста“ 2018 за филм од неанглиско говорно подрачје, која ја доделува Американската академијата за филмски уметности и науки.
Настанот „Европски филмски ѕвезди“, како дел од Берлинале годинава, по 22-ри пат по ред, ќе започне на 8 февруари, кулминирајќи со свечена церемонија на доделување на наградите во Берлинале паласт, на 11 февруари.
