Министерот за економија Крешник Бектеши, која вчера на прес-конференција ја помеша црвената со зелена нафра, и тврдеше дека не може да има забрани за неа затоа што се користи во земјоделството, денеска изрази убедување дека ќе се стави крај на злопутребата на екстра лесното масло за домаќинство, познато како „црвена нафта“.
Првпат по две децении, рече тој, во земјава има државна мобилна лабораторија за контроли која веќе функционира.
Одговорајќи на новинарски прашања по денешната прес-конференција во Владата на која заедно во вицепремиерот Кочо Анѓушев ги образложија ефектите од Законот за финансиска поддршка, Бектеши не прецизира колку инспекции се досега направени и упати одговор на ова да се побара во Бирото за метрологија.
– Јас сум убеден дека ќе ја спречиме злоупотребата на екстра лесното масло за домаќинство. Дека правиме големи напори во оваа насока, покажува фактот дека првпат по 20 години во земјава има државна мобилна лабораторија за контроли, која веќе е набавена и се користи од Бирото за метрологија во соработка со Државниот пазарен инспекторат. Што се однесува до акцизата, тоа е во надлежност на Министерството за финансии. Таму обратете се зашто тие ги прават сите анализи и оценуваат какви се буџетските импликации – нагласи министерот Бектеши.
