Сирискиот претседател Башар ел Асад изјави дека САД се држава изградена како „политички режим на разбојнички групи“.
– Американскиот претседател не ја претставува државата. Тој е само извршен директор на компанијата. Зад тој директор стои управен одбор составен од големи американски компании кои се вистински сопственици на државата: тоа се нафтени компании, производители на оружје, банки и други лоби групи – рече Асад, пренесува Танјуг.
Според него, САД не се држава, туку режим, чие раководство го именуваат компаниите кои работат за своја корист.
– Сакам да ве потсетам на еден момент – еден од најважните фактори што го натераа Хитлер да го нападне СССР во Втората светска војна беше нафтата – рече Асад. Според него, во денешно време САД прават иста работа и ги имитираат нацистите.
– Експанзија, освојување, поткопување на интересите на другите народи, газење врз меѓународното право, хуманитарни основи и слично. И сето тоа заради нафтата – заклучи тој.
