Вицепремиерот Кочо Анѓушев денеска истакна дека наскоро ќе се најде конечно решение за оданочување на каматите на депозитите и за данокот на капитални добивки.
– Овие две работи треба да се раздвојат и јас сум за првото, значи депозитите и каматите на депозитите да се даночат. Што се однесува за второто, односно капиталните добивки, тоа е нешто што мислам дека треба да се стимулира. Јас апсолутно не сум за одложување на тоа да се воведе тој данок. Е сега, втор е данокот којшто е на капитални добивки. Данок на капитални добивки е доколку имате акции во некоја компанија и работите на берза и во тој случај сте ги купиле акциите по една цена, сте ги продале по друга цена и на разликата во цена треба да платите 15 отсто. Тој данок мислам дека треба да се пролонгира – потенцира вицепремиерот.
Според него, пролонгирањето ќе биде во насока на стимулирање на работењето на берзите.
– Бидејќи нашата берза е млада, треба допрва да се развива и сите држави коишто биле во тој сегмент на развој го направиле тоа за да ги развијат берзите и берзанското работење и да ги охрабрат компаниите коишто се друштва со ограничена одговорност да се трансформираат во акционерски друштва, бидејќи тоа е еден од начините како да дојде свеж капитал во тие компании. Јас акционерски друштва немам и немам никаде акции, така што тоа апсолутно не ме тангира – рече Анѓушев.
Вицепремиерот Кочо Анѓушев денеска на одбележувањето на 70-годишнината од постоењето на Градежниот факултет во Скопје, рече дека платите на градежните инженери платите рапидно растат и тоа е само еден од условите тие млади луѓе да си ја најдат иднината во нашата држава.
– Се разбира, треба да имаат и подобар амбиент, стабилна држава, добар здравствен систем, за да не заминуваат од тука – рече Анѓушев, во врска со проблемот за одлив на млади стручни кадри од државата.
