Битолското културно лето првпат годинава воспостави соработка со амбсадите во Република Македонија, кои имаат свои конзуларни претставништва во Битола, а како резултат на таквата соработка, вчеравечер на БИТ ФЕСТ, се одржа концертот на месинг квартетот „Јозеф Хајдн Брас“, кој беше предлог на амбасадата на Австрија.
На концертот, свое обраќање имаше и австриската амбасадорка Ренате Коблер, која нагласи дека посебно се радува што концертот на австриските музичари се одржува на денот кога Австрија и официјално го презема шестмесечното претседавање со ЕУ.
Градоначалничката Петровска, изрази голема благодарност до австриската амбасада, за прекрасниот концерт.
– Голема благодарност до Амбасадата на Австрија и почесниот конзул на Австрија Валентина Илиева за поддршката со културен настан – концерт на месинг квартет Joseph Haydn BRASS. Прекрасно звучеа. Во себе носеа дух исклучително впечатлив. Посебна чест направија со нивниот аранжман на „Македонско девојче“ – рече градоначалничката на Општина Битола, Наташа Петровска.
Во салата на Народниот театар тие се претставија со: Триумфален марш од Аида – Џузепе Верди, Анданте од концертот со труби во Ес- дур – Јозеф Хајдн, Увертира кон операта “Волшебната флејта” – В. А. Моцарт, Анданте симфонија „часовник“ – Joзеф Хајдн, Унгарски танц бр. 5 – Јоханес Брамс, Czardas (Чардаш) - Виторијо Монти, Валцер од џез свита бр. 2 – Димитриј Шостакович, Take the „A„ Train – Дјук Елингтон, It don´t mean a Thing- Дјук Елингтон, Just a Closer Walk (Traditional), 12 th Street Rag - Euday Bowman.
